Lao Statistics Bureau
 lsb

     ສູນສະຖິຕິແຫ່ງຊາດ

   Lao Statistics Bureau


 Untitled Document

ລາຍລະອຽດຂ່າວ


  

ບົດຖະແຫຼງຂ່າວ ຂອງທ່ານ ຫົວໜ້າ ສູນສະຖິຕິແຫ່ງຊາດ, ທຽບເທົ່າຮອງ ລັດຖະມົນຕີ ກ່ຽວກັບ ການສຳຫຼວດພົນລະເມືອງ ແລະ ທີ່ຢູ່ອາໃສ ຄັ້ງທີ IV ປີ 2015


        ໃນທ່າມກາງທີ່ທົ່ວ​ພັກ ທົ່ວ​ປວງ​ຊົນ​ລາວ ທັງ​ຊາດ ກຳລັງສຸມໃສ່ຈັດ​ຕັ້ງຜັນຂະຫຍາຍ ບັນດາມະຕິກອງປະຊຸມໃຫຍ່ຄັ້ງທີ X ຂອງພັກ ແລະ ແຜນພັດທະນາເສດຖະກິດ-ສັງຄົມ ແຫ່ງຊາດ ຄັ້ງທີVIII ແລະ ໃນເວລາດຽວ ບັນດາປະເທດໃນທົ່ວທຸກມຸມໂລກ ກໍ່ພວມຂູ້ນຂ້ຽວ ຈັດ​ຕັ້ງ​ປະຕິບັດເປົ້າຫມາຍ ການ​ພັດ ທະນາ​ແບບ​ຍືນ​ຢົງ (SDGs). ຕໍ່​ກັບສະພາບ​ການ​ດັ່ງກ່າວ ​ແມ່ນ​ມີ​ຄວາມ​ຮຽກຮ້ອງ​ຕ້ອງການ​ທາງ​ດ້ານ​ຂໍ້​ມູນ​ຂ່າວສານ​ທີ່​ເປັນ​ລະບົບ ​ແລະ ຕໍ່​ເນື່ອ​ງສູງ. ການ​ສຳ​ຫຼວດພົນລະ​ເມືອງ ​ແລະ ທີ່ຢູ່​ອາ​ໄສ ທົ່ວ​ປະ​ເທດ​ແມ່ນ​ການ​ສຳ​ຫຼວດໜຶ່ງ ​ທີ່​ມີ​ຄວາມ​ໝາຍ​ຄວາມ​ສຳຄັນ ​ແລະ ​ເປັນ​ແຫຼ່ງຂໍ້​ມູນຕົ້ນຕໍ ໃຫ້ແກ່ລັດຖະບານ ແລະ ອົງການ ຈັດຕັ້ງສາກົນ ​ເພື່ອສະຫນອງບັນດາຂໍ້ມູນ ດ້ານປະຊາກອນ ແລະ ຂໍ້ມູນດ້ານ​ເສດຖະກິດ-ສັງຄົມ ກ່ຽວກັບພົນລະເມືອງເພື່ອເປັນບ່ອນອີງພື້ນຖານໃຫ້ແກ່ການຕິດຕາມ, ການສ້າງແຜນ ແລະ ການ ຈັດຕັ້ງປະຕິບັດບັນດາຄາດໝາຍ ​ແລະ ແຜນງານຕ່າງໆ ​ໃນ​ແຕ່ລະ​ໄລຍະ.

 ​​ເຫັນ​ໄດ້​ຄວາມ​ໝາຍ​ຄວາມ​ສຳຄັນ​ດັ່ງກ່າວ ​ແລະ ພາຍໃຕ້ຂໍ້ແນະນຳ ຂອງພະ​ແນ​ກສະຖິຕິຂອງອົງ ການສະຫະປະຊາຊາດ ​ໃນ​ລະດັບ​ສາກົນ ​ແລະ ພາກ​ພື້ນ ຕ້ອງ​ໄດ້ຈັດ​ຕັ້ງ​ປະຕິ​ບັດ ການ​ສຳ​ຫຼວດພົນລະ​ເມືອງ ​ແລະ ທີ່ຢູ່​ອາ​ໄສ ​ໃນ​ທຸກໆ 10 ປີ. ລັດຖະບານ​ແຫ່ງ ສປປ ລາວ ໄດ້ກຳນົດ​ການ​ສຳ​ຫຼວດພົນລະ​ເມືອງ ​ແລະ ທີ່ຢູ່​ອາ​​ໄສ ​​​ໃວ້​ໃນ​ກົດໝາຍ​ວ່າ​ດ້ວຍ​ສະຖິຕິ ​ແລະ ຍຸດ​ທະ​ສາດ​ການ​ພັດທະນາ​ລະບົບ​ສະຖິຕິ​ແຫ່ງ​ຊາດ 2010-2020 ​ແລະໄດ້​ຈັດ​ຕັ້ງ​ປະຕິບັດ​ມາ​ແລ້ວ 3 ຄັ້ງເລີ້ມແຕ່ປີ 1985, 1995, 2005 ແລະ ຄັ້ງຫລ້າສຸດແມ່ນ ເດືອນ ມີນາ ປີ 2015 ຜ່ານມານີ້ ໂດຍ​ແມ່ນສູນສະຖິຕິແຫ່ງຊາດ, ກະຊວງແຜນການ ແລະ ການລົງທຶນ ເປັນໃຈກາງໃນການປະສານສົມທົບກັບພາກສ່ວນຕ່າງໆ ໃນການລະດົມແຫຼ່ງທຶນຈາກບັນດາປະເທດເພື່ອນມິດກໍ່ຄືຄູ່ຮ່ວມພັດທະນາ ແລະ ຈັດຕັ້ງປະຕິບັດການສຳຫຼວດ ໃນຂອບເຂດທົ່ວປະ ເທດດ້ວຍຄວາມຫ້າວຫັນ ແລະ ເປັນເຈົ້າການ. ການ​ດຳ​ເນີນ​ການ​ສຳ​ຫຼວດຄັ້ງ​ນີ້ ເປັນ​ຂີດ​ໝາຍ​ສຳຄັນ​ທາງ​ດ້ານ​ປະຫວັດສາດ ທີ່​ລັດຖະບານ​ໄດ້​ໃຫ້​ຄວາມ​ສຳຄັນ ​ແລະ ປະກອບສ່ວນ​ທາງ​ດ້ານງົບ​​ປະ​ມານຫຼາຍ ກວ່າ 60 ສ່ວນ​ຮ້ອຍຂອງງົບປະມານ​ທັງ​ໝົດ.  

ການ​ສຳ​ຫຼວດພົນລະ​ເມືອງ ​ແລະ ທີ່ຢູ່​ອາ​ໄສ ທົ່ວ​ປະ​ເທດ ຄັ້ງ​ທີ IV ປີ 2015 ​ໄດ້​ຖຶກຮັບ​ຮອງ ​ແລະ ອະນຸມັດ​ຢ່າງ​ເປັນ​ທາງ​ການ ​ໃນ​ວັນ​ທີ 11/9/2013 ​ໂດຍ​ແມ່ນ ​ສູນ​ສະຖິຕິ​ແຫ່ງ​ຊາດ, ກະຊວງ​ແຜນ ການ ​ແລະ ການ​ລົງທຶນ​ ເປັນ​ໃຈກາງ​ໃນ​ການຈັດ​ຕັ້ງປະຕິບັດ. ການ​ດຳ​​ເນີນ​ການ​ສຳ​ຫຼວດຄັ້ງ​ນີ້ ​ໄດ້​ແບ່ງ​ອອກ​ເປັນ 3 ​ໄລຍະ​ທີ່​ສຳຄັນ​ຄື: ​ໄລຍະ​ການ​ກະກຽມ, ​ໄລຍະ​ການ​ເກັບ​ກຳ​ຂໍ້​ມູນ​ພາກ​ສະໜາມ ​ແລະ ​ໄລ ຍະ​ການ​ປຸງ​ແຕ່ງ​ວິ​ໄຈຂໍ້​ມູນ ​ແລະ ຂຽນ​ບົດ​ລາຍ​ງານ. ​ໃນ​ໄລຍະ​ການ​ກະກຽມ ​​ໄດ້​ສຸມ​ໃສ່​ການ​ກະກຽມ​ທາງ​ດ້ານ​ວິຊາ​ການ ​ໂດຍ​ສະ​ເພາະ ແມ່ນ​ການ​ສ້າງ​ແຜນການ​ສຳ​ຫຼວດ, ການ​ລະດົມ​ແຫຼ່ງທຶນ, ການ​ສ້າງ​ຄູ່​ມື ​ແລະ ​ແບບ​ສອບ​ຖາມ, ການ​ຂື້ນ​ບັນຊີ​ຄົວ​ເຮືອນ ​ແລະ ການ​ຝຶກ​ອົບຮົມນັກ​ເດີນ​ສຳ​ຫຼວດ ​ແລະ ນັກ​ກວດ ກາ. ​ເພື່​ອຮັບປະກັນ​ປະສິດທິພາບ ​ແລະ ຜົນສຳ​ເລັດ​ຂອງ​ການ​ສຳ​ຫຼວດ ​​ໄດ້​​ແຕ່ງ​ຕັ້ງ​ຄະນະ​ຊີ້ນຳການ​ສຳ​ຫຼວດ​ໃນ​ຂັ້ນ​ສູນ​ກາງ, ຂັ້ນ​ແຂວງ ​ແລະຂັ້ນ​ເມືອ​ງທັງ​ໝົດ​ 1,592 ທ່ານ ​ເພື່ອ​ເຮັດ​ໜ້າ​ທີ່ໃນ​ການ​ຊີ້​ນຳ-ນຳ ພາ ​ແລະ ​ໂຄສະນາ​ເຜີຍ​ແຜ່​ການ​ສຳ​ຫຼວດ. ນອກຈາກ​ນິ້ີ້, ​ໄດ້​ແຕ່ງ​ຕັ້ງນັກ​ກວດ​ກາ, ນັກ​ເດີນ​ສຳ​ຫຼວດ ​ແລະ ພະ​ນັກ​ງານຂັ້ນ​ບ້ານທັງ​ໝົດ​ປະມານ 45,756 ທ່ານ ​ເພື່ອ​ເຮັດ​ໜ້າ​ທີ່​ໃນ​ການ​ເກັບ​ກຳ, ການ​ຕິດຕາມ​ກວດ ກາ ​ແລະ ອຳ​ນວຍ​ຄວາມ​ສະດວກ ​ໃນ​ການ​ເກັບ​ກຳ​ຂໍ້​ມູນພາກ​ສະໜາມ. ການ​ເກັບ​ກຳ​ຂໍ້​ມູນ​ພາກ​ສະໜາມ ​ໄດ້​ຈັດ​ຕັ້ງ​ປະຕິບັດໃນ​ເດືອນ ມີນາ ປີ 2015. ການ​ປຸງແຕ່ງ ​ແລະ ວິ​ໄຈ​ຂໍ້​ມູນ​ ແມ່ນ​ນຳ​ໃຊ້ລະບົບ​ສະ​ແກນ​ເນີ​​ເຊິ່ງ​ໃຊ້​ເວລາ​ປະມານ 6 ​ເດືອນ ​​​ໄດ້​ສຳ​ເລັດ ການ​ວິ​ໄຈ ​ແລະ ສ້າງ​ບົດ​ລາຍ​ງານຜົນການ​ສຳ​ຫຼວດ​ເບື້ອງ​ ຕົ້ນ​​ ​​​ແລະ ໄດ້ປະກາດນຳ​ໃຊ້​​ ​ແລະ ​ເຜີຍ​ແຜ່​ ຢ່າງ​​ເປັນ​ທາງ​ການ ​ໃນ​ວັນ​ທີ 10/12/2015. ຈາກ​ນັ້ນ​ໄດ້​ສືບ​ຕໍ່​ວິ​​ໄຈ​ຂໍ້​ມູນ ​ແລະ ​ສ້າງ​ບົດ​ລາຍ​ງານ​ຜົນ​ການ​ສຳ​ຫຼວດລະດັບ​ຊາດ ​​ເຊິ່ງມາ​ຮອດ​ປະຈຸ​ບັນ ແມ່ນ​ສຳ​​ເລັດ ​ແລະ ຈະ​​ໄດ້ປະກາດ​ນຳ​​ໃຊ້ຢ່າງ​ເປັນ​ທາງ​ການ​ໃນ​ມື້​ນີ້​.


 Untitled Document